النهارده بقا هكلمكم عن إزاى الرجاله بتبوظ الجوازه..

هبقا بكذب عليكم لو قلت لكم إن فيه أى راجل بيبوظ جوازته بإيده .. إطلاقا .. مطلقا .. أبسوليوتلى..
إحنا –الرجاله- كائنات لطيفه – وديعه – نسمه – بلسم – سكر مكرر- بلابل بتغرد ع الشجر يا ناس.. هيهى هيئ..

1- حد فيكو شاف راجل مبتسم بكسوف وهو بيتكلم مع واحده تانيه ولما لمح مراته قلب سحنته كأنه بيكلم إسماعيل بيه!!!! ما بتحصلش ..
طيب شفتى عينيه هتنط على ست فى التليفزيون و كأنه بيندب حظه على الفرق بينها وبينك .. مش ممكن طبعا إحنا عينينا مليانه..حد فيكوا شاف راجل بيتريأ على مراته وزنها طبيخها كلامها رأيها تربيتها لولادها ..أو حتى ينتقدها .. ما عمرهاش حصلت..
بزمتك يا مؤمنه شفتى راجل بيجعر أو حتى بيعلى صوته؟ طبعا كلكوا فى نفس واحدهتقولوا أبدا ما عمرناش شفنا كده
طيب شفتوا أى راجل فى أى حته بيحاول يفرض رأيه؟ إتلاكا طبعا
طيب شفتوشى راجل منفض للمسئوليات اللى عليه وسايب الدنيا تضرب تقلب .. أبدا أبدا..
الراجل يعيبه ايه ؟ .. جيبه .. وده كمان ما يعيبناش.. دى الحاله الإقتصاديه بتاع البلد.. يعنى إحنا مافيناش عيب .. والدليل إن الراجل من دول بيبقا شايف نفسه كده (جورج كلونى) على (براد بت) ..
تعرفى ده منين؟

لما تشوفى الراجل معجب بعوده كده وعامل عرض أزياء لانجيرى فى الصيف وفرحان بسيقانه كده و ناسى إن الفلينه مش مغطيه ربع كرشه التحتانى!!! .. كلنا جورج كلونى.. الشعب يريد جورج كلونى..

2- عمركوا شفتوا راجل كاتم مشاعره جواه ..أبدا أبدا والله.. ده حتى الرجاله كلها عندها إسهال عاطفى .. ماشيين بندلدق مشاعر .. طول الوقت يقول لمراته.. بحبك يا روحى .. و يرن لها فى الشغل عشان بس يقول لها وحشتينى يا حياتى..طول الوقت مش مكسوفين من مشاعرنا و هنموت ونوصلها للمدام أول بأول .. جدعنه دى ولا مش جدعنه؟.. ههههههههه..

ولا أى مشاعر .. أبقا شحط كده وأقول خايف وحزين ووحيد أو حاسس بالضعف.. يا نهار أغبر دى تبقا فضيحه .. أنا فريد شوقى و محمد رمضان مضروبين فى الخلاط يا هانم..
و دى أهم نقطه عندنا (الرجاله).. أنا راجل والمشاعر دى ضعف و بتاعه الحريم .. ده اللى اتربيت عليه.. ده اللى اتعلمته.. الله يجازيهم بقا..

3- طيب عمركوا شفتوا راجل بيطلب أى حاجه هو محتاجها بقله زوق أو أوامر .. إطلاقا.. أغلبيه الرجاله محتاجه تشوف إنك مبهوره بيه وقاعده ليل ونهار تمجدى فى كل فسفوسه بيعملها .. تتغزلى مثلا إنه مستحمل صداع من ربع ساعه.. إنه راح الشغل النهارده.. إنه ساب ريموت التليفزيون و بطل يقلب فيه و ما يتفرجش .. أو حلق دقنه يوم الجمعه..

4- طيب شفتى أى راجل فى الدنيا مش حاسس بمراته واللى بتعمله ومشاعرها .. أبسوليتلى .. دى الرجاله مشغله الرادار بتاعها 24 ساعه عشان تحس بالكائن المزعج اللى إسمه الزوجه.. و بيموتوا نفسهم إنهم يعذروا الزوجه .. بس إنتوا يا زوجات اللى ما تقدروش.. معلش وسعت منى دى .. وربنا بنحاول بس الرادار عندنا عطلان من آخر يوم فى شهر العسل (قصدى 3 أيام العسل).

شوفوا بقا ..بصى لى بقا و ركزى .. أيوه إنتى.. الراجل ده كائن جميل ووديع و مسالم طول ما هو فى الجحر بتاعه..
جحر ايه؟

آه .. كل واحد فينا له جحر خصوصى بتاعه.. ساعات الجحر يبقا صغنن وساعات يبقا غويط أوى .. مغاره أو بير 
تلاقى الراجل السكره دهون يتسحب و يشد الرحال ع الجحر .. يقعد يفكر فيه إزاى يعدل المايله.. إزاى يصلح الكون.. دماغه منهمكه فى الكون اللى بدأ حاله يميل زى ما يكون فيه كوكب هيصطدم بالمجره بتاعتنا ويدمرها ..و هو مسئول يفكر إزاى يبعد الكوكب النوتى ده عن مجرتنا وينقذ البشريه جمعاء ..جمعاء .. و دماغه بتجيب وتودى .. يلاقى الهانم بتطب عليه فى الجحر بتاعه- لا أحم ولا دستور- تسأله عنده غيارات عايزه تتغسل أصلها هتشغل الغساله!!!!!!! يا ربى .. ايه اهميه أم الغسيل دلوقتى وانا بحاول أنقذ الكون.. ههههههههه

و إحنا فى الجحر بتاعنا بنفكر فى اللاشيئ او كل شيئ بنبقا إشطه و بيس .. تمدى ايدك حضرتك فى الجحرليه؟ عايزه تطلعى جوزك من الجحر عشان قال ايه يقعد معاكى والحميميه والتواصل والونس والحب والكلام اللى ما يأكلش عيش ده!! .. هتلاقى الراجل إتحول .. و الله بنتحول فعلا .. لما نحس إن أيادى خفيه داخله لنا الجحر تطلعنا منه.. و فى لحظه ما الراجل دماغه تطلع بره الجحر يتحول .. و وشه بيقلب زى الزومبى .. فجأه يبقا صوته الرقيق دهو جعير .. بيطلع لنا عضلات الرجوليه.. وتبان الرخامه بتاعتنا بجد.. ننزل فيكوا أحكام وإتهامات..
بيبقا جوانا:

إنتى عايزه ايه منى؟

ما تسيبينى متنيل على عينى ملهى فى حالى !!

ايه أهميه إنك تنادينى !! أقعد معاكى ليه يا ست إنتى !!..

الدنيا أخلاقها باظت والأجيال بقت زى الزفت والعولمه وثقب الأوزون وبترول الخليج والشركات عابره القارات بتتوغل وتتغول ..والتعليم الدخيل على قيمنا الإسلاميه .. والأوضاع السياسيه فى أمريكا اللاتينيه على وشك الإنفجار .. وأمريكا مش عاتقانا و روسيا منفضه لنا .. و إنتى جايه تنادينى أتفرج معاكى على التليفزيون؟؟؟؟؟ يا نهار أسود.. ده إنتى دماغك فاضيه بجد.. حسبى الله و نعم الوكيل..

على فكره الراجل مننا ما يقدرش يقول لمراته كان بيفكر فى ايه.. لا هتفهمه ولا هتحس بيه.. هتقول وإحنا مالنا ..قال ايه المهم يقعد معاها وتبقا حياتهم حب و حنيه.. يا شيخه!!!
و على فكره كل راجل عامل لنفسه جحر بمزاجه .. اللى جحره عشان يصلح الكون (جوا الجحر) واللى جحره سياسه واللى جحره أحلام ورديه بستات على النت .. واللى جحره حواديت شغله.. و اللى جحره كوره وعربيات .. واللى جحره فاضى خالص (هِو .. خواء .. الهوا بيصفر فيه).. وكل واحده متجوزه عليها تعرف جحر جوزها اسمه ايه..
جحر جوزك إسمه ايه ؟

الخلاصه فى التوقعات….. إذا كانت الستات بتتوقع عيشه هنيه فيها راجل بيحبها ويقدرها ويراعيها و يهتم بيها ..(تون) هادى من المحبه والإحتواء.. عم الحاج بقا بيتوقع حاجتين إتنين .. لذه حسيه عارمه وإنه سيد البيت يأمر و هى تطيع.. وغالبيه أوامره إنه يبقا (حر).. يأنتخ وقت ما يحب ينام زى ما هو عايز .. ييجى الشاى لحد السرير..
أول ما تنكسر توقعات الباشا خصوصا فى اللذه الحسيه يبدأ شويه أفكار فى الدرا ..فى الخباثه .. تنتهى بيه لإنه ينزوى فى الخن بتاعه .. الجحر بتاعه أو يبتدى يبص على ستات تانيه و يندب حظه.. فى الحقيقه دول خمس نقط ..

1- التوقعات المبالغ فيها جدا الوهميه ..

2- السيطره..

3- الجحر الرجالى

4- الأفكار اللى مش معلنه ويسيبها تعفن

5- البص بره .