اللعب مع الذاكره (التلاعب بالذاكره) لتخطى آلام الماضى

1- البدايه: إختار مكان هادى ووقت مش هيبقا فيه أى إزعاج لك على الأقل 20 دقيقه..
2- حدد ذكرى مؤلمه لك و تتمنى إنك لما تفتكرها تانى تلاقيها مش مؤلمه.حدد الساعه كام وقت ما قررت تتذكر الذكرى دى.
3- إقرا الكلام ده: (كلام عن الذاكره) بوست قديم من سنه..
 ذكرياتنا اللى بنخزنها فى مخنا أنواع كتير منهم نوعين مهمين ذكريات الحقائق (ذكريات الأحداث) و ذكرى المشاعر اللى إتوجدت ساعه الحدث.. يعنى لو حد حصل له حادثه عربيه ..هتبقا ذكرى الحدث هى كل تفاصيل الحادثه.. وذكرى المشاعر هى ذكرى الخوف والرعب اللى كان حاسه لحظتها..

إحنا بنعتقد إن الذكريات ثابته زى فيلم سينما كل مره هنشوفه نلاقيه زى ما هو.. لأ  خالص.. الذكريات زى ملف (word) مكتوب على الكمبيوتر مش ملف pdf)) .. كل مره بتفتحه وتقراه وترجع تخزنه تانى إما إنك تسيب كل المكتوب زى ما هو بالظبط .. وساعتها بيتخزن بتاريخ جديد بس.. تاريخ آخر مره زرت فيها الملف .. وممكن تغير فى الملف ده وتخزنه بآخر تاريخ شفت فيه الملف (الذكرى) .. كأنك بتفتح ملف ال word)) وتكتب فيه كلمتين.. تصلح لك تصليحه.. تكبر الخط.. تحط خط تحت جمله.. تمسح سطر.. إنت حر.. وبرضه هترجع تخزنه بآخر تاريخ..

و لما ترجع تفتكر ذكرياتك تانى بتفتح آخر ملف مش أول ملف.. بتفتح اللى انت غيرت فيه.. مش الأصلى .. المتحور مش الحقيقى .. كل مره بتفتح الملف بيبقا قدامك 5-6 ساعات تغير فيهم الحقيقه ..و الست ساعات يبدأوا من بعد 10 دقايق من فتح الملف.. كأنك بتسيح الحبر اللى كان مكتوب بيه الملف وساعتها تقدر تغير طول ما الحبر سايح.. الحبر ده بينشف بعد 5-6 ساعات بالظبط.. حبر الذكريات ممكن نتلاعب به.. يعنى ممكن اللى حصل له الحادثه ييجى يفتكرها فى مره.. واحد تانى يقول له ده العربيه اللى خبطتكم كان سقفها أحمر وكاوتشها مفرقع والإشاره بتاعته كانت خضره وتكتب ده كله فى الذاكره الجديده وممكن ما يكونش صحيح خالص.. وممكن إنت تشهد فى محكمه بجريمه إنت نفسك غيرت فى أحداثها لمجرد انك شفت فى التليفزيون كلام وصور عن الجريمه فى أول 6 ساعات.. 

وعشان تغير ذكريات إنفعالاتك ومشاعرك  لازم تكون مش بس بتفتكر الحادث طيارى كده .. لأ لأ .. لازم تعيشه كأنه بيحصل بجد دلوقتى…. ولازم تعيشه و تفتكره فى جو آمن جدا و آمن (لعشرة دقائق) على الأقل .. عشان الحبر يسيح .. و دى شروط مهمه .. و ده اللى بيحصل فى ببعض انواع العلاج النفسى خصوصا السيكودراما.. تعيش الحدث فى جو آمن .. وتسيح حبره وتكتبه من الأول وجديد .. صحيح تغيير ذاكره الأحداث مش صعب جدا .. و الحمد لله على ده و إلا كنا فقدنا هويتنا.. إنما الأجمل هو سهوله تغيير ذاكره المشاعر.. فتفتكر الحادثه من غير خوف.. أو يفتكر أهوال الحرب من غير ما يترعب.. أو بنوته تفتكر حادث الإعتداء عليها من غير خوف أو غضب.. وده ممكن يحصل بأدويه بسيطه كمان .. مثلا فى أى حادث مؤلم لو إدينا للى حصل الحادث ده دوا معين ما يخزنش ذكرى المشاعر إلا خفيف جدا جدا.. و ساعات بجلسات تنظيم إيقاع المخ (اللى كنا بنسميها جلسات الكهربا) 
 و لو كملنا التمرين الجاى ممكن نتلاعب بذاكره المشاعر المؤلمه.

4- لسه فاكر الذكرى اللى إنت حابب تبقا مش مؤلمه؟ فكر فيها .. أتمنى تكون قريت ده فى حوالى 7-8 دقايق..
5-  دلوقتى هنبدأ التمرين اللى إسمه يد على القلب (hand on the heart) و عملناه آخر يوم فى 2016 .. 

(ا) ببساطه حد إيدك على قلبك و خليها طول التمرين فى مكانها .. كانك بتحس دقات قلبك .. بتحس جسمك.. بتحس طيبتك و سكينتك و جمالك و أمانك و قبولك.. إتنفس بهدوء .. واظب لدقايق على تنفس منتظم و عميق .. عمق الشهيق بيوتر الجسم شويه لكن عمق و طول الزفير بيهديه جدا .. والمداومه عليهم سوا بتعادل بعضها و بتصيبنا بهدوء .. بيخلق لك مساحه بين التوتر والهداوه.. تابع الهواء وهو داخل من أنفك لرئتيك و تابعه وهو خارج من فمك .. كلما ركزت على متابعه تنفسك كلما هدأت.. 

(ب) إستدعى لذاكرتك  أكتر شخص بيحبك فى الدنيا .. شخص بيحبك لذاتك مش عشان أعمالك .. شخص قابلك كلك على بعضك من غير شروط ولا أحكام .. تخيل وجوده ملاصق لك .. وجود مفرح و بيطمنك.. حس وجوده لحد ما تحس عضلات وِشّك بتتفكفك و تتحول لإبتسامه.. حس الطمأنينه فى قربه .. حس جسمك كأنه فرحان بوجوده جنبك .. حس الدفا .. حس رحمته وطيبته معاك.. ممكن يكون جدتك أو جدك .. ممكن حبيبك.. ممكن رضيعك.. ممكن حتى قطتك.. 

(ج) إستمتع باللحظات دى و طوّل فيها قدر الإمكان.. ولما تحس إن جسمك كله مستريح .. إستدعى الذكرى المؤلمه..بشرط إن يكون مر عليك من أول ما قررت إنك تتذكرها أكتر من 10 دقايق.. عيش الذكرتين سوا .. ذكرى أحب الناس ليك و ذكرى الألم سوا .. هيغالبوا بعض .. فى لحظات هتحس إبتسامتك وفى لحظات هتحس إنقباضه فى عضلات وِشّك.. إسمح للأمور تسير بسلاسه.. من غير مقاومه و لا تحاول تغّلب ذكرى على التانيه..

(د) إستمتع بوجود الذكرتين لدقايق .. ما تستعجلش أى حاجه.. وإبدأ فى تأمل جسمك من فوق لتحت .. من راسك لقدميك.. وإحمد ربنا على كل جزء بمحتوياته ووظايفه و بتأنى .. بتأنى..والحمد بتأنى إنك تركز جدا على وظيفه كل جزء .. مثلا أنا هركز على السمع لثوانى هدقق فى كل شيئ سامعه وهتأمله .. وهكذا مع كل الوظائف حتى الإسترخاء التام.. 
 يمكن أن تقرر الآن إنهاء التمرين..